أخيرا - صابر فرج
انا من زمان مستني تشريفك
وصبرت ياما لحد ما جيتني
جيتني في مشيبى
والزمن ضايع
كان نفسى نتصاحب انا وانت
تحكيلي واحكيلك
وتقولي ايه عامله البنات وياك
مين اللى بتعاند
ومين شابكها هواك
واقرا في قصايدك كل شطحاتك
واشوف في رسمك صدق تعبيرك
عارف ياابني قبل تشريفك
كانت حياتي ناقصه أسبابها
والدنيا رغم اتساعها
واقف علي بابها
ودخلتها وياك
دخول الفارس المغوار
اصبح لي اسم ووتد
والدفء مالي الدار
والمزن يوم ماتولد
اتفجرت أنهار
واتجملت صحارينا والوديان
واتزينت روحي
وبيك بقيت انسان .