قليل قوى - صابر فرج

ساعات أشوف الصبح جاى معتل المزاج
مالهوش في الزقزقة
داخل على يومه
بدون ابتسامه
محنى الكتاف
خواف
. . .
وساعات أشوفه عجوز
أهتم
كليل النظر والشوف
مسنود على عكازين
من جريد النخل
. . .
وساعات يكون عيل شقى
يرمى التراب فى العيون
ويتبول على المخاليق
. . .
وساعات يكون مارد
وعملاق
ويدوس على ضحك البشر
. . .
وقليل قوى
لما بشوفه مخلص النيه
وجاى للبشريه
شايل كيسين
فاكهه
وخضار
وناوى بعد الفطار
ياخدنا رحلة للعمار
والحب .