يوم كئيب الملامح - صابر فرج
يابنت هاتى المقشه
العتمه ع السلم
واصله لحد الباب
خايف ل تدخل أوضه ورا اوضه
ونفقد الأصحاب
..
للعتمه ألف طريق،
وألفين وش
وساعات تكون شبوره ف أزازك
فأيه يكون ملاذك
وساعات تكون حروف باهته وكدابه
ناعمه نعومة الرمله فى الرجلين
لكن بتسحب معاها راحة البال
فا تشوفى كل الصور صفرة ومقلوبه
والكلمه معطوبه
وكأنها طوبه
محدوفه على وشك
دى العتمه زى الشرشره تحشك
...
يابنتى
وانتى اللى حيلتى
رتبى دارك
قيدى ف انوارك لأهل البيت
واتهجى كل الحروف
وعلمى شمالك
تصدق مع يمينك
دا الحب يبدأ مع السرسوب
وتهنينك
ل احسن ولاد البطن ماتهينك
ف يوم كئيب الملامح
وأبن حرام .