عمدان السرير - صابر فرج
يابنت ضحكة عيونك
مرتبه ولحاف
والشفتين:
عصير
وخشاف
وغمازات ف الخد
تشبه هلال العيد
والقوره تشبه فانوس رمضان
ف ليلة قدر
نفسى يابنت الناس ف تسبيله
0000
غطينى م البرد اللى هل علينا ومرصرص
دا طوبه قبل الميعاد
فارد جناحاته
وبيقصقص
خلا الشجر ف القلب
بيرفص
وانتى اللى ضحكك يداوى
ويدفى
ويكفى كل المحتاجين للنور
0000
زرعت قلبك نخيل
وجنيينه
وعيدان من الجرجير
وصفصافه
وهزيت ف عمدان السرير
اتهز
نزلت عناقيد العنب
فرفت عنقودك
0000
ماتكبرى يابنت وتسمى على ضحك مولودك
خد من عيونى الوساع
الحب والطيبه
وخد كتير منك
وبقاله حبّيبه
0000
لما تدقى الهون
وتحضرى المنخل
هزى وليدك
ورشى ف عيون الناس
سبع حبوب ناشفين
والملح والسكر
نادى ف ودن الواد
يسمع كلام راسه
مايكلشى الا من عرق فاسه
ويخاف على ناسه
ومصر تبقى الهوا
الداخل لانفاسه
0000
الواد دا أول فرحتى بيكى
وهو ديكى
اللى بيأدن لفجر اليوم
يصحيكى
وتتوضى
وتعجنى رغفين
من قمح أراضيكى
0000
غطينى يابنت الا انا بردان
داخل عليا البرد من تانى
هاتى السفندى ،
واربطى راسى
دفينى يابنت م الرعشه وم التفكير
هاتى الحرام الخشن
يلزق على لحمى
واشوى لى كوز الدره
واسقينى من نيللك
ارجع معافى
ومن تانى
اهز عمدان السرير
يتهز
تنزل عناقيد العنب
عنقود
ورا
عنقود .