السابق واللاحق - صابر فرج
لما غويت الشقا
قالى الشقا حاسب
فقلت له الملتقى
يبين الغالب
ومشيت لى كام مشوار
خدل التعب زندى
ورجعت تانى الدار
بحلم أكون غاندى
ياضيعة الأحلام
فى عصرنا الحالى
دى العولمه قدام
وانا جوا موالى
انا عنخ توت ممقوت
لافف على كعابى
وخلودى بعد ما اموت
مرهون بأصحابى
ياصحبتى ياكرام
أنا جثتى بينكم
حاتوزعوها بكام
لو بيعها حا يفدكم
انا عضمتين دايبين
لكن تاريخى طويل
وبنيت لكم هرمين
واقفين حرس ع النيل
فهل بنايا سراب
والنيل خلاص امتد
وشربت الأغراب
كاس الشرف والمجد
وابنى اللى من ضهرى
كان السند والأيد
ودفعت فيه مهرى
باعنى فى سوق الغيد
ما بلومش غير روحى
ما انا بعتكم سابق
وانا كان على جروحى
فا جرحكم لاحق
ولاحد خالى الهموم
حتى الحصى فى الأرض
وبايه تفيد الهدوم
للى يبيع العرض
دول كلمتين شاهدين
على ضعفى وخمولى
وان كنتو مش عارفين
العرض من طولى
يبقى افحتوا قبوركم
وتعالوا ف جوارى
انا المسيح وانتم
بعتونى للشارى .