مركب - صابر فرج
مابين صوابعى ضفتين عبير
وأغنية
وموجه بتلاعب وشوش الفجر
ومركبه جايه
شايله المكاحل والعيون الزرق
والشط واقف في انتظار النور
بالحضن يافجر البحور
بالحضن
محتاج دفاك اللي واحشني سنين
هاتلي معاك سحلب ومتحوج
باللوز وعين الجمل
وادهن خيوط الامل
وارسي على شطي
انا شطي مخصوص لانتظار الخير
والمركب الآتي
ماشي على مهله
ياهلتري ح ينوبنا منه شئ
ولا انتظار الآتي
مش آتي.