حوّا مش من طين و دم - عبدالناصر حجازي
إتخبطت فـ خطوتى ،
ووقعت من سطح المتاهة
فانكسر لى ضلع كنت معشّمه ...
أعمل به حوّا
و حبّة الضحك اللى انا حوّشتهم ...
أتدلدقوا من قلبى ساعة ما انكفيت
وفضلت الملم نفسى من بين الحصا ،
وارمى .. بحملى عالعصا ،
واشعر بجوع بيعض روحى ،
ودعوتى العاقر بتزعق فى السّما
لكن بدون ما " المائدة "
تنزل على .... قلبى الجعان
يمكن عشان ناقض وضوئى ،
أو عشان سايب فى قلبى كام صنم .....
ذكرى ...... من الشّرك الاخير !
يمكن عشان سلّفت نفسى للطغاة ،
وادّيت حواسى للعدم !
محتار .....
ومش عارف سبب ......
حزن السما منّى
وقرنى الحادى والعشرين بينكرنى ،
ومش لاقى .. دليل واحد ..
على ... ملكيّتى لنفسى ،
وراكب مركبى الكرتون
ومش قادر .. على النوّة
عشان ضلعى اللى كنت معشّمه ...
اعمله به حوّا ...
إنكسر ،
وحبّة الضحك اللى أنا حوّشتهم ......
إتدلدقوا من قلبى ساعة ما انكفيت