الضلّ - عبدالناصر حجازي
( عايز تكون لك إيد قوية ؟ و تعيش بدال العمر ميّة ؟
حافظ على .. ضلك عشان .. الضل حقك في المكان
الضل إثبات الهوية )
الضّل
خايف على ضلّي ..
لا تتبعتر ملامحه ،
و السحابة السودة تكنس به الطريق ،
و يدوس عليه حافر هولاكو ،
و أرضي تترّمل ،
و يصبح ورثي في المشتل شوية شوك
بخاف..
لاف يوم ابص ورايا فجأة ..
مالقانيش ،
و ينسرف ضلي ونا مشغول ..
برسم ملامحي ع النخلة اللى ما بتطرحش ،
و القى دمي سايل ع السكك ..
يمسح خطوط عرضي .. و طولي ،
و اتصلب على بّوابات عمري اللي جيّ
أهرب من الخوف الي راكب فوق كتافي ..
و اجري ورا .. ضلي...
بطول الأرض و تخونني ..
هشاشة عضمي و اترنّح ،
أقع من نفسي وامّد لنفسي إيد واقّف ..
عشان خايف ..
لا إيد العتمة تسرق مني ضلي و اتوه ،
ولازم اخاف ،
و اخلّى الشمس ترسم هيكلي في الكون ،
عشان ما تضعيش من رجلي ..
خطاوي مشوها أجدادي ،
و اسيب لولادي حبّة ضل يحموهم ..
من الصهد اللي جاي مـ الغرب