محتاجين لك - عبدالناصر حجازي

تنولد تانى
فى عام (الألف) فيل
مشتاقين
للفجر يطلع من جبينك،
محتاجينك
تحفر(الخندق)تشيل
من قلبنا
(كوم التراب)
هجمة(الأحزاب) على
(خندقنا) أقوى من (الحصون)،
و(الكتاب) مغروس فى جنبه
ألف رمح،
والقبيلة
فى انتظار لحظة شروقك ع الملأ
تشعل الشمع الالهى فى النفق،
نلتمس فيك السلام
محتاجين فعلا نصلى
بس تبقى انت الامام
تنولد شمس الخلاص
جوّة سرداب النفوس
انطفى ف ايدنا الفانوس،
والليل دلق حبره ف سمانا،
والنهار بعدك مليّّل
كل هبّة ريح بتكسر فينا ضلع،
كل يوم بيموت فى حجر الأمةعيّّل،
واللى فاضل من هدومنا
مش ساترنا
فانتبهنا
اننا سيبناك وتهنا
عز مااحنا ....محتاجينك،
محتاجين لك
ترمى حفنة من تراب
فى عيون أعاديك اللى رجعوا يعسكرولك
لمّا سمعوا بموت على
بس لمّا يقرّبوا منّك خطاهم
هايلاقونا كلنا
نايمين مكانك فى الفراش
دا الكتاباللى ف ايديهم مااتقراش
لو قروه
هايلاقوه مكتوب بنورك،
ويلاقوك
نايم فى أحضان المسيح،
راضع معاه من صدرمريم
بس عين الجهل دايما نورها مطفى،
والقلوب العميا صعب تلاقى ع الأرض السلام،
صعب توهب للحياة و الناس مسرّة
محتاجين لك ألف مرّة
نكتب البيعة الأخيرة ونعشقك،
نستنشقك،
تبقى شمس قلوبنا واحنا
نبقى ضلّك
داحنا فعلا
محتاجين لك
محتاجين لك
محتاجين لك