نفسي أخطفك وأطير - ماجد يوسف

نفسي أخطفك وأطير
كأنك ست حسن
وكأني أنا الأمير
لجزيرة من خيال...مليانه أسئله
وبحرها محال ... مالوش بالكون صله
ورملها عبير
يملاها القلب حزن
نفسي أخطفك وأطير
الشجرة كهرمان ... والفله زمرده
وجناحات الحصان...بيضا ومتمرده
وشكلها مثير
كأنه محض فن
نفسي أخطفك وأطير
كأنك ست حسن
وكأن أنا الأمير
بيبانها من الصدف
واللولي والعقيق
شبابيكها والدرف
دهب حق وحقيق
بيبرق في الضمير
ويلمع في الزمن
نفسي أخطفك وأطير
ورا كل باب سؤال
من غير ولا جواب
ومليون احتمال
وحضور يشبه خيال
وحلمنا الكسير
ماهوش حاسس بأمن
نفسي أخطفك وأطير
دي إيدك ياقدر
بتخبط ع البيبان
ودا احساس بالخطر
أم منهى الأمان
نفسي أخطفك وأطير
خلاص ماعدش في
أميره أو أمير
والجرح حتلاقيه
هوه نفسه الأسير
حتى لو كان أمير
أو الشاطر حسن
نفسي أخطفك وأطير
كأنك ست حسن
وكأن أنا الأمير ..