حواجز قلق - محمد أسامة البهائي
كل البوابات
حواجز قلق
وقبل مايعدي
الوقت أتحرق
المكان ع الخريطة
حز فيا بالألم
والقلب جزيرة من عدم
والصمت واقف يجردني
من ضلي
ومن كونيتي
من كل الأسئلة
يستفز فيا
مكر اللحظة بلحظة
وفوق زحامها لارصفة
يهيم عليا شحوب الطريق
اتعتر ف الهم والمحن
وآه ياحلمي من بكاك اليوم
تولاني فوق الدرب الأمنيات
وموصلاني
لخاطر ذكري قديمة
الصحو ة
مين يقدر لها والثورة
ضايع ياحلم
وف البلاد العورة
يامين يسترك ياحلمي
ع البــدن
ويستر العورة
الزمن مراهن
ع الولاد بالموت
يراهن وف عزايا الفتن
وأنا اللي كنت شايل
قلبي بلون البحر الأبيض
يزهزهـ فوق ملامحك بالمهج
تهون علينا
السكك المستحيلة بغربتها
ورطوبتها
وآهات البشر اللي طالتها
ماتهداش مواجعها الليل
تسري ف الضلوع
وعالخدود تجري
من عينها دمعتها
مداك يازمن غفوات
الطايل والبهوات
وغلطتها
بالحوجه غطيتها
شاخص في الحياة
ومدريتها
يضاجع فيا الجوع ع الملأ
وأنا اللي نفسي ألم الوطن
بين أربع حيطان
وأخدك في أحضان
ولادي بالدفا
ألقي اللي ظاهر م الخفي
شاحب كريه السيرة والسمعة
وملهي ف غنيمة الأرباح
وأنا اللي داير في المدن غربة
تاركلك اللي باقيلي من أشلائي
ملفوفة ببعض الورق
وخافيه تحت بطاطك
ورقه بعد ورقه
لحد مايجي عليك الدور تكشفها
وتلاعبني
منزوعة
ومصلوبة
ومقلوبة لحد معاد خطتها
بأيديك أوراقي وعمري وكل ماأملك
تلعب بيهم لعبة دنيئة
وتلوث كل صفانا
العمر
الصفوة
الخيرة
البررة
الطهر
الضحكة
وحلم ولادي
وكل ولاد الأرض حيرتها حياتها
واللي بينهل نهر الدم
وخللا حياة الناس بالغم
مهما هايهنا بقلبه ويفرح
جاي الكيل والوقت ويطفح
تفهمني؟؟
أزاي؟؟
والوقت بــيدبح
وشايفك راضي عليل وبـتسرح .