اليافطه - محمد أسامة البهائي

انتخابات الطول الفارع
هذا لاحوله وهذا مصارع
ويفطهم أهي ماليه الشارع
بترحب بالموت البارع
وبتملا بجثثنا مزارع
التصدير بالعملة الصعبة
وحلوه الدنيا هنا، لو صعبه
الصناديق ها تحل الأزمة
دمك ناقصه لتر بلازما
والبروتين محقون بكيماوي
حتي حليب اللبن الصافي
بقي مضروب بقي مش صافي
بقت العيشة نار ملتهبه
خلت خلق الله مكتئبه
وزرعوا جوه صدورناالرهبه.
ولا يفط سي الحاج شلولح
رمز الكرسي اللي بيتمرجح
خاوي الفكر وخاوي الملمح
اللي هايدبح زي المدبح
جوه المجلس فيا وفيك
تحت القبة فيه تصفيق
وفيه لامؤاخذه كتير تلفيق
وردح مجلجل آخره زعيق
وإن تترحم مين يعفيك
من فواتير الذمم البايظة
اللي دافعها بطفح الدم
تقدر تخطف منهم يافطه
وترسم فوقها إزاي تهتم
اللي بيخطف منك خاطفه
دا اللي بيشرب منك دم
وجرحك يكبر، يكبر، يكبر
لحد ماتعرف كيف يتلم
(حلق كبير لمين ياعم * ياعم روح كدا وأتلم)