الفارس المنتظر - محمد سعيد
قول يا عمنا يا جمال قول وسمعنا
طبل الرصاص والبارود طبب مسامِعنا
و كلامنا أصبح بُكا من كتر أوجاعنا
كلام ف حب الوطن أصيل ولُه معنى
يمكن ف عز المحن يقدر يطلّعنا
لفجر لسه وليد... لنهار يِجَمّعنا
لساك يا اقصى بتنده واحنا ما سِمعنا
باهت اوى صمتنا وما عدشى ينفعنا
كُتر الخَرَس هدنا ولاّ خلاص ِضعنا
دا الدم دا دمنا..ولا احنا ايه؟ بيعنا !!!
*****
والله ما عاد بيطيب لى طبل واخواتى
اسرى ف حضن الوطن والكل بيطاطى
مكتومه يا صرختى يا طول مُعاناتى
غرقنى دمك يا دُره ,, يا صرخه بتهاتى
واللهِ ما اخد عزاك الا ف نهار ...آتى
تطيب معاه الطبول..... ِليّا ولخواتى
*****
عرفت يا عمنا امتى يطيب طبلى
لما تكون الطبول بتقول دا فاض صبرى
والديك يصيح بالقوى والكل قال وياه
يا قدس يا قدسنا يكفاكى قولت اه
راجعين يا مسرى النبى
راجعين نصلى وراه
الفارس المنتظر
هانت خلاص لقياه