تصريح مرور - محمد فاروق عبد اللطيف

من بين وشوش كل البنات انا بعرفك
بنوتة بضفرتين أمل
ورموش عيون متبسمة فى وش الحياة
وان مرة تاه احساسى بين لحظة لقا ونظرة وداع
بلقط افيش الفيلم وافضل ابصله
واخرتها إيه
لو عشت فيه دور البطولة بوهم قلبى مصدقه
فيا تدخليه وتمثلى دورك بجد
ياتخرجى قبل البداية
مصممة عالفرجة والتسإيف
وساعتها ةبس هتقبلى انى بجد أموت
وان كان سكوت رعشة كلامك بسمعه
وف وسط غيمة احساساتك بلمحك بعنية نور
فمتنطقيش كلمة بخاف من بكرة تانى إتكلمى
قولى انى هفضل مؤمنة بشعورى
حتى أن صدنى مية ألف سور
وماتفضليش متعلقة وتوصلينى لمرحلة مصدومة فيها الجاذبية تشدنى وبتشد فوق
أخرتها بفقد لاتزان
فكرت ساعة نرفزةان ابقى قابل للوقوع
بس الدموع سبقتنى روحت مصورك
مركب فضا تصدر إشارة لقلبى انا
لجل انى اعيش انسان
بيخرج من حدود الدايرة واصل للمجرة
اللى انتى فيها اتكلمى
لحظة شروق الشمس من صدر الوجود
وعشان نعود لازم نخش الفيلم
قابلين الشروط
فيا تقبلى عقد الحقيقة عالورق
أو تحجزيلك تذكرة فى أول طابور
والدور عليه استنظرك من بكرة عالشباك
وأقطع معاكى لحبنا تصريح مرور..