المرتد - محمد فاروق عبد اللطيف
الدم فاير
وتايه جوه عرق الحق بين الف اتجاه
علشان فى واحد منا غير قبلته
وكتاب يسكن صرخته سفح الجبل
علشان يواجه ضل..مفرود الايدين
وساعات بيوصل كرهنا يصبح الم
على جتة صبحت يوم بكيفها معلقة
محفورة فوق ضهر الخيانة مصدقة
وهمه اللى بينقط عبط
وان كنت عايش م الاساس اصلا غلط
هين عليك تسلخ فى جلدك
او تشق التوب وتظهر عورتك
ملعون مبادىء حضرتك
ان عشت تزنق حلم عمرك
جوه فرصة عشان تبيع
لما ترهن وقف روحك
بين ايدين نخاس وضيع
وتضيع طهارة فطرتك
فوق صك غفران السراب
مش كل باب مفتوح وراه طاقة امل
ولا كل نبتة فى الجبل تصبح علاج
مرسوم هلاك الابتسامة لطفل ذنبه انك ابوه
وتوه ملامح سكتك فوق قلب مصلوب الجسد
ووشوش غريبة بتتولد تطرح سواد
وان كنت عايز تبقى يوم عواد.. فبيع
واياك تضيع وتحمل الغلطة لقدر
ومش بعيد تحس بكرة بالخطر
وتغير الملة لصنم
وان كان وجودك فيه الم
على كتف ساند فوق مافيش
فاقبل وعيش ..فرع مايل من وره
واقرب فروع مستكترة
حتى عليك فى الموت كفن
فياريت تحاول تندفن
فوق ارض بور ..