صبح السراب - محمد محمدين

مهما ديك الفجر يدِّن .. م تقوليش ..
تفتحيش قلب الستاير ..
قلبي خايف
تدبلي يا شهر زاد العمر مني ..
تبتسملك .. رقصة الموت الأخيره ..
آمر السيَّاف يغيب الصبح بيكي
ينطفي ضوء الحكايه ..
ينهدم قصر الأماني .. أنتهي ..
ترفعي سيف الهزيمه .. أنحِني ..
أنزف حكاوي ..
يتغزل توب الحداد اللي يلفلف ..
روحي لمَّا تبعدي عني وانا واقف أسيرك
إمنعي طيرك يرفرف جوَّه روحي
عتِّمي صبح السراب اللي بياخدني ..
من حواديت الليالي .. من عنيكي ..
حلمي عايش بيكي ليكي ..
فيكي أسرار المعاني .. الأغاني ..الأساطير القديمه ..
أبجديات انتصاري .. انبهاري ..
انهياري .. لحظة الصمت .. انتظاري ..
امنعي عني اختياري ..
روضي وحش السؤال ..
اللي ف وريدي ..
عن حكاية حب ست الحسن ..
للشاطر حسن ؟!