همزة وصل | محمد محمدين - شطر

همزة وصل - محمد محمدين

أحلامه مسافره لقلب الشمس ..

الفارده إيديها لكل الناس

بينوّر شمع ف ليل الخيل ..

الجامح م الراس ع الكراس !!

بيسابق ريح الأيام بعنيه ..

المليانه بدمع الإحساس

بيبعتر طعم حروفه ف قلب الكون ..

بيشيل اللون الباهت ..

من أحلام الناس ..

وبدمع عيونه يزهِّي اللون

يضم الضي الباقي فروحه ..

ويلم الأيام الجايه ..

يبدرها ف أرض الخير ..

تتفرع نور وأمان

وطيور بتطير ..

للجنه الحنه المزروعه فروح ..

الإنسان .. ألحان .. !!

ولسانه يبوح ..

بجروح الخلق ..

النابته ف صحاريهم صبَّار !

يبدأ ف عنيهم .. م الأول ..

خطوة عاشق ..

لتراب يتحرر م الخوف ..

ويشوفوا البحر المتوارب ..

ع الفجر المكشوف للشوف ..

وياخدهم .. م الدنيا الواقفه على رقابهم ..

يفتح بابهم ..

ع الأرض الدفيانه بنور الحلم ..

المنقوش ف كتابهم ..

ألف إجابه لأي علامة استفهام !!

كان نفسه يكون ..

عنوان .. ألوان .. إحساس .. أنفاس .. أجراس ..

كان نفسه يكون ..

أيام .. أحلام ..

ويضم العمر الباقي لصدره ..

وينام .. ينام !!!