صعب أتحرك لوحدي - ميسرة صلاح الدين
صعب أتحرك لوحدى
صعب فعلا صدقيني
مدى دراعاتك خدينى
خرجينى من سكوتي
أطلقي العصافير فى صوتي
نهر جارف
قلبي مش قادر يجازف
قلبي متجمد فى جلدة
حتى لما بيعلا مده
يستحي يلمس خضارك
من زمان وأنا فى انتظارك
ألف ضحكة وألف ليلة
شهرزاد يا أم الضفيرة
حلى شعرك فوق كتافى
وردة حمرة
تقصر المسافات ما بينا
فاكره يوم لما أتقابلنا
بنت حلوة
وشاب مليان بالأماني
بس مهر الحب غالى
وأنتي غالية
دا أنتي أغلى من وجودي
ساكنة أبعادى وحدودي
حتى ساكنة تحت جلدى
راضية أم حتى ما ترضى
مدى ايديك
واضحكيلى
كل شىء جوايا يضحك
كل شىء حوليا يضحك
والسما والارض تضحك
ينكسى قلبى بربيعك
والحنين يشرق فى عينى
لو تجينى
قلبى فى وجودك يسمى
ثم يذكر
كل حاجة رابطة بنا
فاكرة يوم لما اتقابلنا
قد ايه كان يوم جميل
قد ايه الليل طويل
وانتي غايبة
وانتي حاضرة
فى اى حتة بعيدة عنى
رايحة فين دا الشوق قتلنى
إرجعيلى ومدى ايدك
يتصل قلبى بوريدك
وأحضنك بأيدين خيالي
شعرك المفرود ليالى
خدني ليكى
قلبي سلمته لعنيكى
وأنتي قلبك كان بيحدى
صعب اتحرك لوحدى ..