صلصال - ميسرة صلاح الدين
قلبي كان صلصال في قبضة عشق جارف
سندس البوح ع الشفايف
هز قلب الليل سخونة وفضفضة
وانفجر ينبوع ندا
زى أوراق البنفسج
لما تلقط روج خفيف من شفايف بنت حلوة
دويت لحظة تمنى في ابتسامات الصبا
قلبي كان صلصال في قبضة عشق جارف
أول لقا سايب لهيب في الذاكرة
أما القلق جوايا كان فارس رهيب
فارد عبايته ع المشاعر كلها
ح اسـتأنس المد اللي جاى وأعيش عليه
ولاّ حقاوم للأبد
جوايا شك وحيرة وكنوز اشتياق
وحنين ليالي طويلة مروية احتياج
برفض ساعات الشوق يشكل مهجتي
برفض دموع الفرحة ودموع الفراق
وساعات كتيرة بحن مجذوب وأرتعش
وأطلع جبال اللهفة متردد وخايف .