طاح العراق - أكرم التلاوي
طاح العراق وانتهى حكم صدام
والنفط الأسود جففوا له محيطه
بغداد صارت كلها حروب وألغام
والجرح زاد وما قدرنا نخيطه
حنا التهينا بالصحافه والاعلام
وامريكا صارت ترسم النا الخريطه
سنه وشيعه أكراد لعبوا بالاسلام
طحنا طوايف في بحور ٍ غويطه
حنا نحارب بعضنا وعمنا سام
كوّش على البترول وأضحى يحيطه
عام ٍ مضى يتبعه عام ٍ ورى عام
متى بتصحي يَكبر أمه عبيطه
منهو عليه الدور مصر ٍ أو الشام
ولا الخليج يقصوا باكر شريطه ؟
الناس ترجم في منى إبليس هالعام
وابليس هذا العام ما هو بمحيطه
ابليس ساكن وسطنا يزرع أوهام
واحنا بصمتنا أكثر امه نشيطه
أمريكا صارت رب وإحنا لها قيام ؟
ولا هي صارت عند ربي وسيطه ؟
اليا متى نغرق بساطير وأحلام ؟
واليا متى نقول المصيبه بسيطه
مليار حنا وكل أبونا غدا أيتام
حتى الكرامه في دولنا لقيطه
ننسى جروح العام ننظر لقدام
وندري بإن قدام ساقه ربيطه
صرنا لسام اليوم توقيع وأختام
ما غير هرج ٍ واللساين سليطه
اليوم أمره كان حكم ٍ بالاعدام
واحنا الهيامى بالدروب السقيطه
صدام يا رمز الشجاعه يصدام
جسر العروبه زعزعوا اليوم حيطه
طاح العراق وانتهى حكم صدام
وبغداد صارت خارجه من الخريطه