جنية الشعر - أكرم التلاوي

جنية الشعر جتني لابسه (البكيني)
لعنبوها لئيمه ويش جتني تسوّي

لو براسي قصايد تاه شعري فيني
ولو هو جاني لهامي غيرت لي جوّي

يومها ناظرتني وجتْ عنيها بعيني
اظلمت لي كوني واعمت اللي ضوّي

قلت هذي أكيده جاتني بتغريني
امهليني دقيقه وابعدي وتروّي

واثرها المنحوسه جاتني بتبليني
في حديث الساسه وقامت ابه تعوّي

حمّلتني يراعي وصارت تمّليني
عن بلادن مِنّا وضعها متلوّي

بين دمعن زايف صنّعوه بالصيني
وبين خبث ٍ مخفي صامت ٍ ومدوّي

تبكي طفلٍ عربي ودمعها يبّكيني
يوم دمه سايل لأرض جاره يرّوي

وثاني يوم ٍ تلقى كفها المبليني
في حراره يصافح في يدين اعدَوّي

وال يخلي فكري تايه ومشقيني
من أرضها يطلع قصف الاعدا الجوّي

والقنابل يحمل عادي ( عينك عيني )
من قواعد فيها يوم إنه ينوي

يحمل أعتى سلاحه جاهز ٍ ويجيني
مفطر ومتغدي ولا بعد متقهوّي

يهل العروبه والله ان دينه ديني
لا هو بنصراني ولا يهودي وعلوي

ضاق صدري قامت حرب بيني وبيني
وكل ضيقه قامت ثاني ضيقه تطوي

قلت يا جنيه ابتديتي ؟ انهيني
ارحلي عن شعري وقالت اصبر توّي

قلت والله ما أكتب آنا عارف طيني
لو أطاوع نفسي ادري وش بتسوي

أسألك بلله إنك م السياسه اعفيني
واحسبيني بصحرا مثل أية بدوي

راس مالي الخيمه ومزنة ترويني
ودام سقفي ثابت فوق غيري تهوي

فارقيني وأوعك ثاني مره تجيني
باللباس الماصخ خلي لبسك شتوي