جيت والله جابك - أكرم التلاوي
ثغرك وخدك وهمسك والشَعر وعيونك
والهدب والموت الأحمر ( توتك وعنابك )
رمشك وقدك وسحرك والخصر وفنونك
ضحكك ومزحك وجدك جيّتك وغيابك
كلهم يدرون إني بالهوى مجنونك
وانت تدري مير لكن يا برود أعصابك
كم فقد قلبي جنود ٍ عند باب حصونك
وكم قضى من جيش شعري يالغلا بحرابك
رحمة الله في عداك وي الله ي الله عونك
كان هذا فعل يدك في قلوب أحبابك
تفرح بجرحي ويظهر للملا مكنونك
والحزن يسكن ضلوعي لا سرى لاهدابك
ودي أقبّل تين تينك وأقطفه زيتونك
ودي أعيث بجنتك وأحيا بمرج خضابك
وديَ اسكبه الغلا مره بوسط صحونك
شمي وذوقي واقلّطي يا عسى يهنا بك
يلي منك ما خذيت إلا جحيم ظنونك
ودي أنعم في هواك وأشربك وأروى بك
كنت أنا أقرب ليدك من خيوط ردونك
وكنت أنا أقرب لقلبك من نبض يحيا بك
وكنت أكفكف لك دموعك والعرب يرثونك
يوم يلي قد حسبته صاحبك يغتابك
ويوم خانك من هو يلي قد حسبت يصونك
ما وفا لك غير قلبن ما انحسب بحسابك
ذاك يلي كنت دايم تنظر له دون ك
وذاك يلي قلت عنه ما يثير اعجابك
وذاك يلي عاش عمره تايه ومغبونك
يومك بذله تراهن يردعوك اصحابك
ذاك أنا يلي لحينه جاي تشكي طعونك
كم شكى قلبي طعونه تحت رحمة نابك
ذاك أنا يلي زمانك كم خطف من لونك
وجيت توك ترتجيني ( جيت والله جابك )
روح ماني شامت ٍ بك كان ربي بعونك
مير أنا قلبي نحرته بعد صكة بابك
ثغرك وخدك وهمسك والشَعر وعيونك
والهدب والموت الأحمر ( توتك وعنابك )
رمشك وقدك وسحرك والخصر وفنونك
ضحكك ومزحك وجدك جيّتك وغيابك
كلهم يدرون إني قِد كِنت مجنونك
مير قلبي اللي توفى وش غدا يبغى بك ؟