رحمة الله ياغصون - أكرم التلاوي
سال دمعي بالمحاجر وأمطرت كل العيون
وإعتلى الخفاق طعنه كاد يوقف من أثرها
من قريت بهالجريده نعي للطفله غصون
قمت أنعى قلوب ناسن فارقت مسكن صدرها
أمس نشكي غوانتنامو ونشكي تعذيب السجون
ونطلب الإفراج للي ساكنينن في أسرها
وقمنا نصرخ نستغيث وننكر اللي يفعلون
وما درينا ان فينا ناس تتبع في أثرها
طفلتن أعيى جسدها كثر ما جاته طعون
ما طعنها شخص كافر ما أظن إنه قدرها
زوجة الأب المصونه ( ما استطاعت أن تصون )
طفلتن في عمر ورده حظها قاسي غدرها
عذبتها بدون رحمه وين يلي يرحمون ؟
زهرتن ذبلت صغيره في وقت قاسي نحرها
لو احد قلي وربي قلت : ضربن من جنون
حتى يلي بدون قلبن والله انه ما قدرها
كيف يالله ما تخافك ؟ كيف تجلد هالمتون
كيف تقوى تشوف دمعه ؟ كيف شاحت في بصرها
والأبو لا قلت ( أب ٍ ) ينطق لساني الحنون
لكن اللي ما هقيته أب حنيته قبرها
في جسد بنته تهاون قال هالزوجه تمون
تجلد البنت بقساوه رغم هذا ما نهرها
وينكم يلي بحقوق المراءه دوم تطالبون
وينكم عن حق بنتن ما أحد منكم ذكرها
وينها حقوق الطفوله يلي عنها تدافعون
طفلتن صارت بحاجه تنحمي ( م ) اللي بزرها
رحمة الله ألف رحمه رحمة الله يا غصون
رحمة الله عالضماير صارت أقسى من حجرها
الشجر لا صار بيده يقطع أطراف الغصون
ما نلوم الفاس دامه قام يقطع في شجرها