يلي تماديت - وصفي الصبرات

يلي تماديت بهجر خلان وأ صحاب
ملعون بَيّ إلي عنك أبعدوني

والله حرام ما القى منك ترحاب
ويوم إلي جيتك صديت عن عيوني

تعيشني السنه إحدعشر شهر بعتاب
وشهر إل بقى حايرن في ظنوني

لرضاك أحسب ألف حساب وحساب
وانته تدور رضا كل الناس دوني

مدري حبيبن صرت ولا من جملة أحباب
ولا غديت تحب من يبغضوني

والله ماأهوجس وعليك ماني بمرتاب
بس إلي أقوله من إلي تشوفه عيوني

مدري تشوف بي شي ينعاب ؟
ولا تحاول تختبر لي سكوني

صحيح بالي طويل بس مو بارد أعصاب
الله لا يوريك حزة جنوني

بعد ما جمعتك بنثرك مثل التراب
لين أوريك إنك منت شي دوني

أخليك تشوفني وتقول:وش جاب لجاب
ماكون عون إبليس ترى إبليس عوني

أوريك نجوم الظهر وأحرق لك أعصاب
وأشوفك تعاني وعنك بصرف عيوني

ماني صغير تسد بوجهي أبواب
ويوم إلي أجيك تقلهم يصرفوني

بالأمس إنته إلّ كنت لرضاي طلاب
واليوم تغرس خنجرك في متوني ؟

ترى متوني شديده ومثلي ما يهاب
ومثل ما جربت طعنك تعال جرب طعوني

مكان إبتسامة شفاهي أخلك تشوف ناب
ولوصار دمعك نهر ماتحرك شجوني

ويوم إلّ تجيني وتعتذرأقلك إلّ تاب تاب
تبّي مني المطر يوم جفت مزوني

وأقلك الله معك دربك خضار وأعشاب
رح دور إلي يبيك أناواجدإلي يبوني