الوقت ضيق - حسين بن سوده

الوقت ضيق والإجازة قصيرة
والوعد منك للأسف غير مضمون

تسرح وتمرح في الجميرا وديره
وانا مقيد في اتيكات (سوربون)

يلي حملت من الصفات الخطيره
أفكار بن جريون وأفعال شارون

ظلمتني ظلم العرب للجزيرة
تخدم قضاياهم وفيها يسبون

واحرمتني من حب سلمى وميره
إلي على أفكاري وشعري يموتون

مدري علامك ياعمي البصيره
أقول لك من هون وتقول من هون

مادام تتحرى الامور الصغيره
واشلون قلي يضبط الوضع وشلون

أجيك شاكي شر وقتي وخيره
أبيك تدري قبل لناس يدرون

وتحسب اني بس مجنون غيره
مجنون لا والله ماني بمجنون

لوكل من بيده يقرر مصيره
ماكان آجيك وفي يدي غصن زيتون