لابارك الله فيك - حسين بن سوده

لابارك الله فيك ياشيطاني
ملعون واشوار الردا ملعونه

درباً تبعتك فيه ماوداني
إلا نهايه أمنه مضمونه

من منطلق حرصي وكبر إيماني
بطلق قيود افكاري المسجونه

وارسم معالم ديرتي وأوطاني
في ارض لا مأهوله ولامسكونه

واعزف على أوتار الزمان الحاني
وأخلي الأرعن يزيد ارعونه

عالجت انا اقلوب البشر مجاني
وانأ مريض ومالقيت امعونه

يسعيد تكفى لاتثير اشجاني
وتذكر القلب الشقي مضنونه

قفا وخلاني اسير احزاني
من عقب ماعاهدته أن ماخونه

ما أثرت في قسوته قيفاني
وماهو على شانه عشان اعيونه

قفا وروح فوق بنز الماني
من سرعته معذور تعرف لونه

من بون جاء مطلوب عاني عاني
والي مع قرقاش مايشرونه

قطع طريق العين في ثواني
يعد فوق 4 طبلونه

ياسيدي يالعالم الروحاني
يستاذ في علم الهوى وفنونه

اشلون ؟ يبغاني ولايبغاني
وشلون بالله هالحكي وشلونه

أن كان لجله (زين) يتحداني
مزيونه القى مثلها مزيونه

وأن كان يتغلا انا أش دراني
إن الغلاء يوصل لحد اجنونه

مجني عليا في الهوى والجاني
مطلوب امنياً وبيقبضونه

في ظل قايدنا رفيع الشاني
إلي يسود ارض الوطن قانونه

ماهمني واخوان شماء اخواني
يعني بيجيبونه بيجيبونه

الله وأكبر كيف؟ يازماني
اذبلت غصن التين والزيتونه

من قبل لامن قال صح الساني
يوزن بيوتاً لم تكن موزونه

واليوم ميزان الشعر ميزاني
أجيد شي الناس مايجيدونه

ماني بذاك الشاعر اللبناني
على دلعونه على دلعونه( )

مازلت نفس الشاعر (الظبياني)
إلي يحب الناس ويحبونه

وانا ولله الشكر ماداني
ناسً تثير احقادها المدفونه

رغم الشلل والكيد والحرماني
طلت اللذي بالفعل مايطولونه

هذا كتابي يعكسه عنواني
ولأذكياء من مظهره يقرونه