جرّح بعد جرّح - شيخة الجابري

صب الألم في مهجتي صب واربك
جرّح بعد جرّح وزيد البهاذيل

مجنون حبك عاجبه فعل قلبك
يا محتويني من عنا الصبح لليل

وش فايدة بعد الهجر قلت أحبك
وش فايدة مشتاق لك يا هوى حيل

دام الليالي عننا ترتحل بك
يا الله عسى دربك وفوق وتساهيل

سهرت ليلي أحسب الليل جنبك
شوقٍ يلاقيني على صهوة سهيل

ما كنت أظن إن الفرح مات قربك
وان السعاده ما تجي بالتوسيّل

ضيعتني مابين سلمك وحربك
وأنا على عهدك يسامرني الويل

صبيّت شوقي ورد في جمر دربك
ولقّمت دلّة نشوتي في رجا الهيل

وين العمر يالمهتوي وين شط بك
أشوف صبري منزوي حظه بخيل

ولهان قلبي محترق ملته ٍ بك
مشتاق يسمع رنة النار والسيل

آه أحبك آه مليون أحبك
وانت منى عمري تزيد التغربيل

عني بعدت بعيد عِندك لعب بك
ما كنني وياك عشت التعاليل

ناري غدت في القلب ترقص وتدبك
وشريان روحي م الوله صابه الميل

حاولت أتجاوز معك كل صعبك
وأمطّي أمواج السفر والتراحيل

ربي كتبلي بعدك ومُر قربك
وأنا على هذا أجر المواويل

وانت ولاهمّك ولاتخاف ربك
دايم تهددني بقطع المواصيل

مسموح روّح لك توافيج دربك
وأنا لي الله ودمعتي والتفاصيل