بلبلة شاعر عبيط - ظافر الحبابي
غيمٍ تشوفونه رسا فوق المحيط
في ذمتي ما هلّت مزونه عبط
عذب المطير اللي مع المالح خليط
أغبى غشيم اللي يقول انّه غلط
ما عانق الجبّار مدّات البسيط
لولا بسيط الشان باحضانه قلط
لا تنشد المرغوب كيف اغدا سقيط
أو كيف ذا المرهوب للساقط لقط
دامك تفك الرمز وتحل الوسيط
بتشوف موج الما عليه الما نقط
والاّ لزوم انّك تفيق وتستحيط
قبلك كثير اللي نسا الشور و ورط
اللي يظن السر في اليم الغويط
ان شاف غيره في متاهات انبسط
واليوم انا افل المسابح خيط خيط
(غابة كلام) اذكى ثعالبها سقط
ما همني لو قالو (لسانك سليط)
او ناظروني نظرة (عتاب وسخط)
كل الحكايه:بلبلة شاعر عبيط
يلعب على الحبلين في شعر النبط
تدري وش افضل وضع لو كانك وريط؟
بحروب وجندك كلهم خمسه فقط؟
صايح وكثّر هرج وقرّب للنشيط
واقصر من القامه وخلّك في الوسط
في كلمتي حرفٍ بطارفها ربيط
اليا عتقته بانت اهداف الخطط
دوّر مكانه وارجع ولف الشريط
وافصل (ثلاث ابيات) وبرّق في النمط