حبك ارهاب - عارف زينل

اشوفك ابتعدت اليوم ما ادري وش الاسباب
عسى ما شر يا وجه الخير طمني باحوالك

اشوفك مبتعد عني وتاركني مع الاغراب
وتعرف قدرك ابقلبي وتعرف وين منزالك

ابيك اتكحل اعيوني ابيك اقرب من الاصحاب
ابيك اتمر لي ساعه وتعرف كيف انا هالك

ابيك اتشوف احزاني ابيك اطل على (المنصاب)
ابيك اتروف في حالي وتبقى لقلبي المالك

ابيك اتعرف من يوفي ابيك اتعرف منهو غاب
ابيك اتعرف من حبك وحطه زين في بالك

اذا جيت (اهلاً وسهلاً) وإذا ما جيت ظني خاب
خساره كيف هو قلبي تجافيني ويلجالك

خلاص انهيت هالماضي وقصتنا على المرقاب
بخلي هالبشر تنظر وتعرف كيف اعمالك

بذوقك الفراق المر لجل تعرف من اللي عاب
لجل تعرف بتضحيتي وتعرف كيف اهمالك

ابي ارحل عن اعيونك ابي ابحث عن اللي ذاب
ابي ارحل عن الماضي وخل الهم اقبا لك

ترى ان قلت لك راحل ماني مثلك انا كذاب
ابرحل جد عن حبك وانا ماهمني اوصالك

فمان الجرح ياعيني وحبك (قصدي الارهاب)
عسى ربي يعذبك ابحبيبٍ يفعل افعالك

قبل لتروح لاتنسى وراك اتقفل الابواب
خلاص النفس قد عافت ظلالٍ بعد اظلالك

وانا ان قلت لك (عارف) نوى ينسى غرام احباب
ترى مالي سبب مقنع ولكن بترك اهبالك