القوس قوسك - علي بن سالم الكعبي

القوس قوسك والسهام سهامك
مالي على رمشاً تسله قوّه

انا اسيرك واقفاً قدامك
واللي تبا تسويه فيني سوّه

وثقت في قلبك وطيب انسامك
ماظن تظلم وانت فيك امروّة

قلبي رهيف ولا يروم هيامك
توه تعلم كيف يعشق توّه

قلباً قطفته لا ترص احكامك
خفف على قلباً حتمت بجوّه

يفداك لكنه يشيل احلامك
ملكك ولا لي منه غير امخوّه

بك زين من راسك ي لين ابهامك
والليل ياخذ من صباحك ظوّه

ما يحجب الويه الصبوح اللثامك
طلتك دايم يالحلى محلوهّ