للي هزنا في وفاته - علي بن سالم الكعبي
كل القلوب الجامحات معسوفه
في الحب للي هزنا في وفاته
لو من يموت تموت عقبه صفوفه
كل العرب ماتوا بلحظة مماته
يا ويل عين اللي تعود يشوفه
ويا ويل قلب وسط دمه غلاته
وويل اليمين اللي تصافح كفوفه
متعوده تمسك قلمه وعصاته
ويلي على زايد وشامخ كتوفه
لي من ضحك يا زين بسمة شفاته
يا صدع قلبي صدع من نزف جوفه
يوم انفجر شريان قلبي بغلاته
النجم الاشهب يوم يعلن كسوفه
تبرق عوض غيبته ذكرياته
عضيت بطن ابهام كفي حسوفه
لو تنعطي سنين العمر قلت جاته
واستغفر الله ما نسابق حتوفه
هذا وجع واعلن بكبدي مباته
يا ما تبادلنا الكلام وظروفه
ويا ما قسم لي لقمته في حياته
ويا ما طرد قلبي بطرياه خوفه
ويا كم وصاني وسرت بوصاته
يا اله بك مزبان نادر وصوفه
يا ذا العزيز بعزتك عز ذاته
يا ذا الجلال ازبن جلالك تشوفه
بعين الرضا واقبل عطاه وهباته
يا ذا الكريم بجنة الخلد روفه
يا مورث عياله مكارم صفاته
أكرم عزيز النفس نفسه عطوفه
ارفع مقامه يا عظيم بسماته
واحفظه يا حافظ وزين ظروفه
يا مثبت الطود العظيم بثباته
وتوفق انجاله بدرب تطوفه
وتعينهم على الصبر صبح ومساته
أسمع صدى صوته وتلفي طيوفه
ويدور في ذهني جزيل كلماته
كتبت من مدمعي مداد لحروفه
وانهيتها والحال عايف مقاته