غيمة تظلك - مبارك الحديلي المنصوري
ان شفت لك غيم(ن) يحفك ويرعاك
ومن واهج عيون الخلايق يضلك
وان شفت براقه على دار مرباك
فا علم بأن الغيم هو روح خلك
اتبخرت من عقب ما طال فرقاك
وصارت سحابه همها تصير ضلك
يا صاحبي شوقي وصلك وتعداك
واصبحت اسوق الشعر قربان لجلك
يمكن يقرب من يودك ويهواك
ويمكن يكون الشعر مفتاح وصلك
ويمكن يخفف من لضا نار طرياك
نارن اظن الروح منها بتهلك
أكرم عزيزن يزعل الناس لرضاك
وشله وسط عينك مثل ما يشلك
حيث الوفا نادر ودنياك تحداك
على الذي طبعه ونهجه يعلك
يا صاحبي اقبل تري الروح تفداك
على الذي إخلاص طبعه يدلك
يكفيني اصبح غيمتن فى سماياك
كلى إلك واصبح انا فيك كلك
وأن شفت لك غيمه تحفك وترعاك
فاعلم بأن الغيم هو روح خلك