شبكني - محمد بن راشد آل مكتوم

شبكني عين مجلود الخصر نجدي
وروحي منه كن الموت يغزيها

وبحر الشوق فيه الجزر والمدي
وتيار الهوى والموج يطويها

وجودي في المحبة كل ماعندي
ترى الأيام تفعل ماتشا فيها

غصون الورد تتعانق من الوجدي
وتتفارق إذا جفت سواقيها

أنا لي حد متعدي على حدي
حدود الغير مانطمع بأراضيها

ولو شفت الورود الحمر بالخدي
حنين الشوق من لمسي يغذيها

آلا يامفردٍ بالزين هل يجدي
إذا غذيت روحٍ انت واليها

كلام العذل لاياخذ ولا يوّدي
ولا يخلف المودة عن مباديها

إذا داريت روح الحب يامودي
ملازيم الوعود الصادقة فيها

تحول أحوال في الترحال والشدي
ودنيا الناس ترسى في مراسيها

ضجيج الشوق خلى البلبلي يشدي
يجر الصوت بالحان يغنيها