مرحوم يا مكتوم - حمد بن ظافر العرجاني
بلفين وسته يوم رابع يناير
شفنا على التلفاز ينعون مكتوم
فاجأتنا ياعام والكل حاير
تبدّلت لفراح والكل مهموم
بأول قدومك بادي ٍ بالخساير
فقد الكريم وطيب الراس شغموم
ماهي خسارة مال ولا عماير
خسارة اللي راح مايرجع اليوم
شيخ ٍ بفعل الخير يامر وشاير
والله وهبه الطيب والطيب مقسوم
تنعيه سبع ٍ دمع اهلها نثاير
والمملكة مع عاهل الدار وعموم
أمر ٍ من المولى مقدر وصاير
لعمار بيد الواحد الحي قيوم
مرحوم يامكتوم تجزي البشاير
بجنة ٍ فيها الصحابه ومكروم
نعم الخلف ايسير ماكنت ساير
بوراشد محمد له الطيب مرسوم
ذكره كما نور القمر للبصاير
في نصف شهر والسماء مابه غيوم
نفرح بحكمه بالجهر والسراير
حر ٍ تعلى للعلى دايم يروم
تسلم لشعبك والاهل والقصاير
والله يعظم اجركم يال مكتوم