هدوء ما قبل العاصفة
الهدوء اللي سبق لحظة حدوث العاصفة
هذا انا لا قلت يالله خل هالغلطة تطوف

كلما تخطين في حقي تقولي آسفة
وانسى غلطاتك واسامح لان قلبي بك شغوف

خايف الزلات تكثر يالعنود المترفه
وخايف تهب العواصف والضحايا بالالوف

كنت اظن الشوق والاحساس للعاشق صفه
لين شفت الهجر منك سل في وجهي سيوف

بعدما كنتي على يوم اللقا متلهفة
كما جيت اسألك عن وصلنا قلتي ظروف

وبعدما كنتي مثال الحب ورمز العاطفة
مات قلبي في يدك يا غاليه وعينك تشوف

امشي في درب الهوى وانتي اشوفك واقفه
لي متى قولي بصراحه لي متى هذا الوقوف

ليه شمس الحب دايم في سمانا كاسفة
خلي شمس الحب تشرق لي متى هذا الكسوف

قالوا: ان كثر السلام احيان يقل المعرفة
وقلت انا كثر الغرام يعذب القلب العطوف

تنزل دموع الشوارع من عيون الارصفة
وتنزل دموع الورق اذا بكت عين الحروف

كلها تبكي علي لانها معي متعاطفة
وكلها تشكي من الايام وتلوم الظروف

وبعدما كنتي مثال الحب ورمز العاطفة
مات قلبي في يدك يا غاليه وعينك تشوف