اخبي الشعر عن عينه - عبدالرحمن الخالدي

اخبي الشعر عن عينه اخاف انه يجي يقراه
اخاف اكدر احساسه بحزنٍ يكسي احساسي

دفنت الحزن في قبر الضلوع اللي بكت فرقاه
واجر الآه ب حروفٍ بكت في صدر كراسي

دموع الشعر ،حرمان المعاني ، همهمات ، و آه
جمر هجر، ودموع فراقّ في حبري وقرطاسي

انا بعت الخلايق كلها والناس لجل رْضاه
لأنه كان لي ربعي واهلي وديرتي وناسي

احبه والله الشاهد وهذا البعد ما اقواه
اكابر واتظاهر بالصبر لين انكسر باسي

انا من لي بعد عينه ؟ انا ما ابغي سوى دنياه
ابيه بسيف وصله يطعن همومي وهوجاسي

بكى في داخلي طفلٍ بحبه والوفا رباه
انا وهذا الطفل عقبه يتامى واليتم قاسي

نسى قلبٍ جعلته خاتمٍ في خنصره خلاه ؟
نسى حبي؟ نسى قربي؟ نسى اللهفه بأنفاسي ؟

نسى ذيك العيون اللي تموت بطلعة محياه ؟
نسى دافي عتابي والغرام الشامخ الراسي ؟

يقول القلب: لا تنساه واقول: شلون بس انساه!
انا وشلون ابنسى من غرامه تاجٍ لراسي ؟

هذاك اللي انا وانته يا قلبي لي أمر طعناه
هذاك اللي بنظره من عيونه يَورق يْباسي

هذاك اللي تفز الروح ولهانه على طرياه
هذاك اللي بغيابه/ عن عيوني أبعد نعاسي

ياليته يرجع ويرحم خفوقٍ ذاب من فرقاه
ياليته يرجع لقلبي ويحيي موت احساسي