نانسي عجرم - عبدالرحمن الخالدي
اشوف بلقيس تتبع نانسي عجرم
ترقص وراها وتحفظ كل اغانيها
تمشي وراها على الباطل وتترنم
تهز اكتافها وتهز اياديها
وشلون بعد الهداية قلبها أظلم
ما كن سليمان للاسلام داعيها
هدهد سليمان أصبح اصقه وابكم
حتى المراسيل ما يقدر يوديها
شفت اكثر الناس تتبلقس وتتعجرم
شف بلقستها تعجرم كل مباديها
في حضرة الماء شفت الناس تتيمم
مير الفروض الصحيحه ما تصليها
دام الفضيله ب معول غيّهم تهدم
هذي الاماني العريضه ليه نبنيها؟
مثل اليهود اطعنوا ستر وطهر مريم
مير ان مريم نطق عيسى يبريها
واحنا سكتنا كأن البوح ماله فم
واهل الردى بالردى يكبر تماديها
كم جاهلٍ للعلوم الطيبه قد ذم
كم ناقصٍٍ سيرة الاجواد يهفيها
لكل داءٍ دواء وبلسم ومرهم
الا الحماقات تتعب من يداويها
ترى الثعالب حشى ما ترهب الضيغم
مير ان له حاجة ٍ بالصمت يقضيها
اذا المعاني لْبست ثوبٍ من الطلسم
بعض الدلالات تكشفها وتعريها
واهل العقول الفطينه تعرف المبهم
وتفسر المختفي داخل قوافيها
في جوفها امتزاج الشهد بالعلقم
ولسان الافكار يتذوق معانيها
شطرٍ به السم وشطرٍ ماء من زمزم
شعرٍ يمثل خلاصة فكر راعيها
دام القصايد شواطي والمعاني يم
اليم دايم يبلل رمل شاطيها
المغترب في ديار الفكر يتنعم
وابن الفكر فكرته ما هوب لاقيها
وان شفت كثر الثنا في ناس ما تفهم
لا تنصدم دام حاميها حراميها
ما كل صحابي قبل غزوة بدر أسلم
واللي شهد بدر دايم يفتخر فيها
قولوا لبلقيس تترك نانسي عجرم
واذا رقصت نانسي للحق تهديها
واذا اصرت ب صوت العهر تترنم
قولوا: سليمان عافك يوم جيتيها
الشاطر اللي من الاغلاط .. يتعلم
والا الغبي غلطته دايم يثنيها