الامطار - عبدالرحمن الخالدي
من يوم غابت هالمطر صار مدرار
واصبح وريدي بدم الاحزان مكتض
ويوم اسئلتني : وش سبب كثر الامطار؟
قلت السما تبكي على صدر هالارض
غابت وكم حولٍ على خافقي دار
وصارت زكاة الحب من ثروة النبض
كني هشيم وهجرها واهج النار
وكني بلاد احتلها عسكري فض
نسيانها لامرني صرت محتار
بين القبول وبين اغراء هالرفض
حزني يمرجحني على حبل الافكار
وقلبي يصب الهم على بعضه البعض
من كثر همي قمت اسولف بالاشعار
اشكي سبب فرقاه واشكي ردى الحظ
عطشان وفي قلبي من الهم انهار
حيران وابهامي اشتكى كثرة العض
من يوم غابت هالمطر صار مدرار
واصبح وريدي بدم الاحزان مكتض
ويوم اسئلتني : وش سبب كثر الامطار
قلت السما تبكي على صدر هالارض