ياحسين - عبدالله بن عيسى آل خليفة
يجلا صدا قلبي من الهم يا حسين
الى اقبل احثاب الوسم وبله نخيله
يمملر على الصمان والعمر يومين
ويشمل الى الداير حشاد مسيله
ووادي الصخير ايهد الى السهل يا حسين
ومن حمو جري السيل يقلب صليله
ويزهي خضار الروض مثل البساتين
وطير الخلا يكثر وحن نعتبي له
ونقنص على شحص النضا بالشواهين
مع الحرار اللي تصيد الفصيله
محلا مطير الخرب برقا الجناحين
الى عاد في قفر وانا محتري له
واطلق عليها ماضي الفعل شاهين
الى احما على الصيده يضيع دليله
أحد يجي بالصيد والكيف له زين
و أحد غدى طيره فيا عزتي له
ومزين مسير الجيش في القفر ياحسين
وأنا على وضحا المذارع طويله
ومع الضحى نشرب من البن فصلين
في وسط روض هم قلبي يزيله
مع شيخنا اللي جعل عمره لنا اسنين
اللي من الضيجات ينجي دخيله
ريف الضعوف اللي من البعد عانين
ومن جاه يشكي الضيم حمله يزيله
وان جا نهار فيه زرق وتطعين
يفرح به البلشان يوم الدبيله
ومعنا الحرار اللي على الجود ضارين
اخواني اللي نايلين النفيله
وحنا هل العليا من اول وذا الحين
ولا خير في هرج بليا صميله
حريبنا لى زام وأعيا عن الزين
بالله عن الزومات نخلف دليله
ومن لا هداه الطيب وأبدى لنا الشين
ناطا على رأسه وغصب نحيله
وبالرجل نجعل له عن الزوم قيدين
ونحمله حمل ثقيل يشيله
ولولا ان كوكب حلمنا طامي الشين
ان كان راعي الزود يلقى عميله
واعذر وسامحني من القول يا حسين
الشعر يبغي فارغ يعتني له
وصلوا عدد ما مال غصن البساتين
على نبي نال كل الفضيله
والآل والصحب الكرام الميامين
ما هل وبل وما جرى منه سيله