بلاد العشق - عبير بنت أحمد

انا لو بسّ / أدري عن بلاد العشق هذي وين ؟
جَحَدت ام السعوديه واهلها بس ّ لعيونه !

مشطْت الأرض طول بعرض لي فوق الثمان سنين
وانا اسابق رجولي خايفه قبلي يلاقونه

شطب قلبي عباد الله .. ْو تحته خَط ّ له خطين
ولو طاوعت (عقلي) كان مبطي عشت (مجنونه)

أجيله بس أبي نظره../..وأرجع ما فوجهي عين
يجيلي مايبي غيري../..ويرجع.. بسّ من دونه !

حبيبي لا مشى / جفنه تمّنى لوهو الرجلين
حبيبي لا بكى / رجله تمّنت لوهي اْ جفونه

حبيبي لاابتسم ينزاح همّ العاجز المسكين
وتتنهّد صدور(الصُّم) لا سولف على هونه

ثلاث ارباعه الطيبه وربعه راح للباقين
ولو ردّوا ثمان اضعاف طيبه ما يجازونه

ولا كامل سوى الله ../ مير عيبه كامل ٍ بالزين
وله حق اْيتِكامل دام مثلي فيه مفتونه

ولا أكثر من اللي يعشقوني / مير هم دارين
أقص لسانهم واقطع يميني قبْل ما اخونه

نعيش و روحنا وحده /... و بادلنا القلوب اثنين
لجل كل ٍ ينشِّد صاحبه - عن نفسه - اْشلونه

توادعنا عشيّة سبت .. ْو موعدنا مسا الاثنين
و همّي صار(شَعري) ياترى هو يعجبه لونه ...؟!

أنقّي في ثيابي../..لا لا َ غيره../..لاا لا َ هذا شين
يا ربي .. وين ابلقى شيّ ٍ احلى منََّه ف كونه ؟!

وأبي أحلى مكان ٍ للقا .. بسْ ما هقيته بين
دبي .. فينيسيا .. باريس .. روما .. كان .. لشبونه...

حدائق بابل .. اللوفر .. ضفاف النيل .. سور الصين
قصور الأندلس .. شاطئ ميامي ... كلللهم دونه ...!

ولا به موضع ٍ يسوى مقامه بين هالأدنين
( فقط لا غير) جنات النعيم اْتليق بعيونه