زمن قاسي - عبير بنت أحمد
ماهي غريبه يا زمن .. قاسي
عاداتك.. الله لا يغيِّرها
مادام حظي طاح متواسي
نشوف وش بيصير آخرها
قلبي كبير .. ومعدني ماسي
والناس تصقل في مظاهرها
ياللي قطعت آمالي بفاسي
وش حاجتك في كسر خاطرها؟
وبعض الكسور..ابني بها ساسي
أقلّها .. ممكن نجبّرها !
ولو ذقت مما ذقت في كاسي؟
عينك بتبكي دم .. وأعذرها
ودي أورِّي دنيتك .. باسي
واخاف لا أجرح مشاعرها !
هجرت لجلك موطني وناسي
وأمّنت روحي عند هاجرها
ناديت حتى بحّت اجراسي
وتسمع ولا حتى تعبِّرها !
وماطعت فيك الصاحب الراسي
حتى اطيع انذال تحقرها
وأدري بصدق الحاسد الخاسي
وأكذب على نفسي بأسايرها
لوهي على همي وهوجاسي؟
هانت على نفسي عبايرها
بس كيف يعجب عينك لباسي
وانا .. منيب اللي تناظرها؟!
البارح اهديتك من احساسي
واليوم اشوفك صرت .. شاعرها !
وانت أقرب اْمن النفس لأنفاسي
وأقرب من الدبله لبنصرها !
وياهونها لاشفت كرّاسي
مصيبته وشلون يصبرها
ماجيت اعزز بالأمل ياسي
جيتك بأعزّي فيك.. وأشكرها
وآذكّرك بالبعد يا ناسي
والا المحبه ؟.. لا تّذكّرها
ومادام طاح الحُب من راسي؟
ماهين نفسي وانت خابرها
من عادتك .. يا قلبك القاسي
خطيبتك .. دايم تغيّرها