الله واكبر عليك - عبير بنت أحمد
الله واكبر عليك شلون ترضاها
بنت ٍ رخيصه ..وتعزمها على جاهي؟
مثل السحابه تصب / ولا نفع ماها ..
ثوب الصحاري ../ مدامه بالرمل راهي
الشمس تشرق ولابه من تحراها
والبدر يسهر طوال الليل بي ساهي
العز داري ... ودون العز مابغاها
والناس تشفق لدار البن والشاهي
وابسط تحية على مخلوق ب ألقاها
في كل مجلس .... مفاخر بي ومتباهي
يومك تنشّد عبير القلب وش جاها
ما ردّ قلبك : " بلاني عنّها لاهي " ؟
سامحت صفحات ذنبك دون ماقراها
وارجع والاقي ذنوبك هي على ماهي
وبطيبة ٍ بي تمنّى مين يسواها
حاولت اعَذرك..وعذري صار بك واهي
ما كنت اظنّك مثيل الناس لولاها
ولا كنت اظنّك تصير المرّ فشفاهي
خلّك تدّنى بحبك مثْل شرواها
وخل ّ التميّز يلاقي حب باشباهي
الله واكبر عليك شلون ترضاها
بنت ٍ رخيصة ...تبدِّيها على جاهي ؟!