يا زين وجه ٍ نوّر مْجمع السيف - محمد الجلواح
يا زين وجهٍ نوّر مْجمع السيف
شفت المجمع أجمل بشوف ضيّه
يا زين خشمٍ أشبه بسلة السيف
والا الدلع واللين و الجاذبية
يا زينها و آنا عيوني ملاهيف
ذيّه تسابق بالنظر شوف ذيّه
جسمٍ رهيبٍ فارقٍ بالتواصيف
شايف بنات كثار ما شفت زيّه
جسمٍ حشا لا ما يبيله مصاريف
وماهو بحاجة ماركة أجنبية
جسمٍ وكاد انه يزين النفانيف
تحلى ولو هي بالية أو ردية
ياهي بنية بهدلتني كما الكيف
أدمنتها إدمان ياهي بنية
كنت بشتا من شفتها إستوى صيف
ماهو طبيعي يشعل النار فيّه
شاعر و لكن عندها شقدر آضيف؟!!
تلعن أبو الأشعار و الشاعرية
وان كنت في وصف المزايين حرّيف
هاك البنية أتعبتني شوية
من غيمتينٍ في سماها مواليف
للكيكتين اللي تلاقو سوية
فتنة على رجلين لللأرض تشريف
تقول رسمة ماهي بآدمية
فيها حلا بنت بدوية من الريف
وفيها بعد من زين بنت حضرية
من زينها عاشت تكسّر مجاديف
أحلى الصبايا،ناعمة بس قوية
هي غالية تسوى عليها التكاليف
لو تبغي عيوني و قلبي هدية
كلي لها لو أصبح لشهدها ضيف
لو تلتقي لحظة يديها بيديه
و كاني أبحّصر هالرقيقة بتعريف
(شيخة لها كل العذارى رعية)
طاري الحسن من دونها زيف في زيف
و اللي تبي تنافس حلاها (غبية)
و ان كان لاجمل هالجميلات تصنيف
هي الاولية يعني الأولية
و الله يصون اللي بنى مْجمع السيف
خلاني ألقى هالخدود الندية
مرّت وقلت: الطيف (بيروتي) الطيف
ردّت: أنا يا غافل (محرّقية) !!