زوبعه - محمد الجلواح
آنا تخرجت يوم انْ دنيتي جامعه
و هي جامعه تعتبر من أعرق الجامعات
كل صدمة ٍ من لياليها تجي موجعه
محاضره تحتوي درس الصبر و الثبات
من دون لا حفظ أو تحضير و مْراجعه
ولا بعض هالشباب يغازلون البنات
و من دون لا آكون طالب يرتفع إصبعه
و عيون دكتورنا تنحاز للطالبات
نلت التفوق بهاذي الجامعه الرايعه
ماهي كما جامعات العصر في إنفلات
هي علمتني مظاهر بعضنا خادعه
البعض يلبس (ذهب) فالبيت ياكل (فتات)
و هي علمتني بوقت الضيق كيف السعه
بْذكر ربي تهون ظروفي القاسيات
و هي علمتني المصايب توهبك منفعه
والشعر أعظم منافع ضيقتي فالحياة
ياهي ثقافات مزدانه و متنوعه
فكري كسبها و صارت فيه متمازجات
شفني بهاليوم لي شخصية ٍ مبدعه
ثقافتي مذهله قصايدي مذهلات
قدري مع الغيم دايم عيني تطالعه
لنّ الرقي في صفاتي هو زعيم الصفات
دربي هو الصعب في دنياي واستمتعه
لا جبت الامجاد في دربه تجي خالدات
لا من حضرت بقصيدي أحضر بزّوبعه
بابيات ماهي كما السائد من التافهات
ألقي قصيدي واشوف العالم متابعه
واوضاعه تكون دهشه و احترام و سكات
أصبحت مقصد هل التحريف و الشائعه
ضريبة اللي غدا مثل العلم شائعات
وبي عيب ماهو بشرعي والزمن شرّعه
زمن بيروقراطي و مطعون بالواسطات
ما املك شهادات مختومه و متوقعه
و هذا زمن يعشق الأوراق المْوقعات
هذا زمن رؤيته يا خوك متقوقعه
أما الشهاده او التهيش لين الممات
من جابها للمناصب ترفعه ترفعه
و هو يمكن احيان فكره غارق ٍ في سبات
ترى الشهادات (بعض احيان) كالأقنعه
تخفي وراها بشر بافكار متخلفات
أجناس فوق المناصب غصب متربعه
متخرجه صدق لكنها من الفاشلات
قدراتها بالعمل قدرات متواضعه
و المشكله تحصد التكريم و الترقيات
هذا زمن بصمة الإبداع به ضايعه
ياهي كفاءات باصناف العطا ضايعات
هذا زمن به يصير الفذ وش موقعه؟
تصدّق يبدّل الأحبار للطابعات
يصحى يروح الدوام الساعه السابعه
الوجوه متشابهه الايام متشابهات
هذا زمن ياخذ الإبداع و يقطعه
يرميه و بلا خجل في سلة المهملات
هذا زمن يفتن الرجال و يمتعه
من كل الانواع عنده للهوى بايعات
يكره يشوف الخلايق ساجده راكعه
و يموت في ( مطربات الهزّ ) و الموبقات
هذا زمن كل بنت ٍ لبسها (تخلعه)
تصير ( نجمه ) تُسلط نحوها الكيمرات
هذا زمن بالرذايل صار في معمعه
مطرب مهرّج و فيديوكليب به راقصات
أجيالنا للغناء اليوم متدافعه
ما اقسى طموح البشر لا صار هالأغنيات
( هيفا ) إلا جات في ثوب العري مايعه
خلّت عقول العرب تندار مثل الرحاة
هذا زمن قد بكى صدام في مصرعه
من بعد ما غامر بدجله و هان الفرات
لا جاه منحط يرفع لجله القبعه
ولا جاه عملاق بالتحطيم سوى سواة
غصن الجهل فالزمن يا خوك من يقطعه
آشوف أطرافه بكل يوم متزايدات
هذا زمن منتهي يحتاج من يصفعه
يمكن يغير مساراته و هي ظالمات
وهذا الشعر ممتلي بالظيم من مطلعه
لكن على الظيم كله به تلاقي حلاة
هذا هو الشعر يا قاريه يا سامعه
إفهم معانيه في تركيبة المفردات
و اليا فهمته حذاري تستوي إمعه
الوضع ما هو بناقص تكثر الإمعات
حكّم ضميرك و ابي من حضرتك تتبعه
و ان كنت مؤمن طلبتك دعوتك بالصلاة
يا خالقي إنصر (الجلواح) ثم اجمعه
باحلامه اللي دفع من أجلها تضحيات
لي فكر جاهز لكل من شك بي يقنعه
بن الشهاده مهي بكل شي في هالحياة
فكري كفيل بخسارة من تواجه معه
لاحراج متخرجين و صمت متخرجات