ثار ظهري - محمد الجلواح
وين بلقى الأمان وبيتي هو غربتي؟
وين بشكي ؟ وانا اللي عزتي ما تهون
حرت بين المواجع حابس ٍ دمعتي
خفت لذرف شقاها والبشر يشمتون
عشت شامخ وأمي ترتجي طيحتي
عشت صادق وابوي يحيطني بالظنون
عشت شاري وأختي ما تبي شوفتي
عشت وافي واخوي بكل بشاعة يخون
يوم ضاعوّ فزعت بخوفي و طيبتي
كنت حامي و كانوّ بالشقا ينتهون
شلت همهم و جازوّ طيبي بطردتي
ضعت منفي على حد التعب والسكون
ضاع عمري وضاعت بينهم ضحكتي
ضاع عمري و هم في غيّهم يضحكون
ورغم كل العذاب اللي عشق صحبتي
صرت شيخ الرجال وليتهم ينصفون
إيه(ثوب الغرابة) يكتسي أسرتي
كفة المال ترجح عن كفوف البنون
و إيه راية جنوني تفتتح غرفتي
لا غدا الشعر فيني هو نتاج الجنون
وإيه يااهلي ويامن طيّحوّ هيبتي
إيه يا اهلي ويا من بالغدر تلتقون
جيت ناوي أوجه لجلكم كلمتي
لكل واحد طعني وذلني بالعيون
صعب أنسى جفاكم لحظة بدنيتي
صعب أنسى جفاكم يومكم تظلمون
جاي يوم ٍ وبكشف للملا قصتي
لين صمتي تفجر بالقهر و الشجون
دمج نار القصيد بترجمة حكمتي
سيف ثاير تعلّى في يسار مغبون
ذاك سيفي و الا منّه دوت طعنتي
تاخذ بثار ظهري من جميع الطعون