ما كان لي - محمد بن راشد المهنا النعيمي

ما كان لي في بدع الامثال رغبه
لولا الخوى اللي زما البعد دونه

اللي نخايل كل يوم الدربه
والكل منا ملهياته اشطونه

ومهما نفكر في نزوحه وقربه
حقه من الواجب علينا نصونه

خوينا معنا برايه وقلبه
وان غاب شخصه وصلنا تيلفونه

عبدالله الفندى وحن نفتخر به
نذكر وفاه وغيرنا يذكرونه

واللي جعلنا راس ماله وكسبه
حقه علينا ما نخيب اظنونه

الاجواد قالوا تملك الحر شربه
واللاش قالوا ملح زادك يخونه

وقالوا بعد للطيب زرع وتربه
والطيب حن زرعه وحنا زبونه

وزرع يفك الوجه من كل كربه
والزرع الاخر ما يوفي اديونه

خلو لنا الاجداد سلم ورتبه
والامجاد سلم اجدودهم يتبعونه

والمرجله ما هي هوايه وطربه
المرجله حمل اثقال اوزونه

حمل ثقيل يتعب اللي نهض به
ولو كان حيد وشايبات امتونه

ولو كان حيد وضاري قد دهل به
اهديب شيال الروا والمؤنه

والمرجله كود على اللاش صعبه
ما جابها اللي يرتضي بالمهونه

واللي يقول الهون قسمه وكتبه
هذا الجبان اللي لنا يوصفونه

وانصحك من ذا لا تشد الظهر به
عزى لعينن في رجاه مغبونه

واياك من ذا النوع لا تحتزم به
راسه وساسه للردى يجذبونه

خويك وعونك دام دنياك خصبه
ودامه يحصل ما تعضه اسنونه

ولادبرت دنياك لا تغتبط به
تراه اول من تفارق اضعونه

ويا حيسفي يا هي مصيبه ونكبه
ان كان في خلاننا ذالنمونه