الشوق والحنين - محمد بن راشد المهنا النعيمي
مريت تالي اليوم بين الصلاتين
دار غدت لي بالمثايل شحينه
دار الفحل نور المحل ريف الادنين
ستر القصور النايفات الحصينه
ديرة أبوي وخلة لي مصافين
ظنينتي يوم ان لكل ظنينه
والفتها ولف الصغار الصديقين
واحبها حب المصلي لدينه
وعلمي بها وقت مضى قبل ذلحين
دار وديرها كثير قطينه
لجت مساييره وصوت الهواوين
تشدي نهار فيه عيد وزينه
واليوم ما فيها سوى ناعب البين
وما عاد من تالي لجاويد عينه
يا سين يا ديرة لجاويد يا سين
كم خاطر عقب الفرح تبشعينه
يا شوفت الله كم غدا لك من الزين
ويا دار هو وقت مضى تذكرينه
يا درو أنا بانشدك وين المحبين
وانتي بعلم صار لا تجحدينه
حيين هم لو تحت الاجداث جاثين
هم يسمعون الصوت لو سافهينه
هل يسمعون الصوت والا بعيدين
معشر هلي يا دار وين اتهقينه
قالت لي اشبح وانظر الحال بالعين
دوك الرسوم المسملات الحزينه
كن الحيا ما مرها دور عامين
مره ولا بالخير مرة سنينه
يا كيف تنشدني وانا بي نياشين
شوف الشنايع للقلوب الفطينة
لا تنشد المأخوذ من حالة الشين
دليل حاله واضح في جبينه
واللي تخبره من عصور مزامين
راعي العنايا والعطايا الثمينه
اللي على قدره تعز البزارين
والقن واللي في العرب داشرينه
وان حفت الحافة بربع مجنين
يبغون من ظيم الليالي السكينة
فك الوسر من راعي العسر والدين
جابر كسر عانيه متعب قرينه
هذاك يا ريف الحشا والنظرين
حال الثرى يا شيخ بيني وبينه
قلت اسكتي يا دار بالك تظجين
وطي حزين الصوت لا ترفعينه
عيني بكت يا دار قبل ان تحاكين
يا دار باقي السد لا تبحثينه
غير اصبري صبر الكرام المعيدين
صبري على شوف الطنا والغبينه
يا كعبة الوفاد في العسر واللين
يا شن بظمر الجوف لو تفهمينه
العذر يا داري انكانك تعذرين
والعفو يا الحاله من اللي تبينه
العسر شين وعقل خطلان الايدين
وما هاش من لا له عضود تعينه
وما يشهر الشامي بليا جناحين
ويش خانة الجيد بليا يمينه
حار النظر يا دار من به تظنين
ظن الجميل اللي مرادك تبينه
اللي يثمن حق شكواك ويعين
ويفك عقل من عضودي متينه
قالت حمد ما غير زبن المخيفين
هديب شيال الحمول الرزينه
هذا الذي شادت بذكره دياوين
زبن اللهيف وريف خاطر زبينه
هذا مصب نهور شط الفراتين
ما هوب غرف بالدلي والمكينه
يصبح به الشرب المولى بساتين
ويخضر به روض نشاش عرينه
وعندي على قولي شهود وبراهين
ولا خير في قول سراف يقينه
قلت اسمعي يا دار ياللي تقولين
تبغين كساب الثنا وتعنينه
يها معي يمه على الفور تكفين
نركب بمشهود الحلايا الحسينه
شف الغوا طرزه ثمان وثلاثين
عون الوليف الي تذكر خدينه
لا من فهق منه الوعر والرفاعين
وانحنى وبان الضلع قد هو وزينه
ناتي من الرسته على كسرة يمين
وننصا القصور النايفات المبينه
يم الصخير وشفك اللي تمنين
هذا هواك وبد ما تاصلينه
نو معروفه عم الاقصى والادنين
هذا نعرفه والملا خابرينه
ان جاد فإن الجود له من قديمين
ومد على غير الوفا لا تبينه
وان كان شح فحضك اللي تعرفين
طوره وميل الحظ ما تجهلينه