تفنن يالقصيد - ناصر بن حمد آل خليفة
تفنن يا القصيد وزخرف الدنيا شعر والحان
ولا خير بقصيدٍ ما يهزّ الروح بالحانه
سلام الله على دار الحضارة دار ابو سلمان
سلام الله على شعب البلاد وكل سكانه
على ارض المملكة نفرح وننثر للعروس الوان
على البحرين يا درّة قلوب الشعب يا دانه
تبارك يا وطنّا جعل جوّك بالفرح عمران
ما دام ان القلوب تذوب في حبّك وفرحانه
تبارك يا وطنّا يا وطن يا غالي الأثمان
تربينا على حبّه وضم الكل باحضانه
على حب ومحبه ضمّنا بأرضه أهل واخوان
تحت ميثاق من حبّ الوطن صانه وما خانه
وتبارك يا المليك اللي عيونه للجميع احضان
حضن شعبه بعينه وامتلا قلبه ووجدانه
حمد هذا حمد عز البلد له في المعالي شان
مكانه فوق هام السحب والله رافعٍ شانه
شجاعٍ له مواقف تربك الفرسان بالميدان
حكم داره بشرع الله واخذ من نهج قرآنه
سياسيًّ محنّك بالسياسه ما يبي برهان
يقود الدار للمجد الكبير ويبني أركانه
تطورنا وسابقنا مع العالم كثير اوطان
تحت عزمه وحزمه للأمور وقوة ايمانه
سجلّ المملكة حافل مع التاريخ والبلدان
وقلب المملكة مفتوحةٍ للخير بيبانه
حفظك الله يا دار الحضارة دار أبو سلمان
وحفظك الله يا شعب البلاد وكل سكانه