آخر قصيدي - نورة الدوسري
يلي تقول اني بالفراق مرتاح
وانا الثواني في غيابك عذابي
لا تحسب ان الشوق لا رحت ينزاح
الشوق لا فارق خفوقك قسا بي
تدري وش الي يذبح القلب لا راح
حبن لقيته في عيونك سرى بي
بالله شوف الهم من نظرتي باح
كلما احس انك مجرد سرابي
شوف العيون اشلون منها الدمع ساح
كنها تنادي لك بشوق وعتابي
جاني قصيدي بين كفي وثمْ طاح
فوق الورق يرجيك وقت الغيابي
ينزف حروف الشعر من زود لجراح
يبكي ولا يلقى لصوته جوابي
احس موتي يوم فرقاك قد لاح
يدني وانا فِالضيق شرعت بابي
لو تدري ابحالي هنا جيت يا صاح
تلعن سبب فرقاك سبة مصابي
تبكي ولا فادك بعد موتي اصياح
تطلب رجوع الي طريقه ذهابي
ما عاد لي ذكرى سوى ذاك الوشاح
ريحة عطر مني بقايا ثيابي
بعض الرسايل جاتك بحزة اصباح
والا بتالي الليل تشكي اغترابي
وآخر قصيدي من سبايبك قد ناح
تبقى حروفه لك بصفحة كتابي
" لو رحت عني صافي الحب ما راح"
لوكنت في قبري وتحت الترابي