اسرار نوره - نورة الدوسري
احيان احس مهما مشيت المسافات
ما توصل الخطوات حلمي وسوره
واحيان احس الدرب كله متاهات
ماتت على ارصفته بقايا زهوره
احيان اتسرع وانهي بدايات
واحيان ابدي درب كله خطوره
احيان احس ان الوفا والصداقات
صارت ملامح باهتة وسط صورة
وآحس ان الحب قد صار غايات
اختلفت ألوانه معاها عطوره
احيان أفقد شخص لو غاب لحظات
واحيان غيبة شخص تشبه حضوره
احيان تتشابه بعيني حكايات
يستدرك اقليبي بعدها شعوره
واكذّب اعيوني من اهوال صدمات
وألقاني ابعالم غريبه أموره
احيان تكسر خاطري بعض حاجات
والصدق آنا من تبكّي كسوره!!
إتحاول اشفاتي رسم زيف بسمات
بس العيون اتبوح اسرار نوره
كل الحكي تقراه في بعض نظرات
لا انسدت افواه الحكي من غروره
واكتب عن اشعوري من الوجد ساعات
أعذب بيوت الشعر ويّا بحوره
واحيان ألاقي في خيالي خيالات
صعبة قصيدي يوصف ابها سطوره